អឺរ៉ុប៖ ការប្រកួតពាន UEFA Champions League បានបញ្ចប់ការប្រកួតទី៤ នៃពូលទាំង ៨រួចរាល់ ជាពិសេសគឺរកឃើញបេក្ខភាព ៤ក្រុមឡើងទៅកាន់វគ្គបន្តទៅហើយ បើទោះនៅសល់ការប្រកួតចំនួន ២ទៀតយ៉ាងណាក្តី។ ម្សិលមិញនេះ គេហទំព័រ EAC បានដកស្រង់ និងបង្ហាញបេក្ខភាពចំនួន ២ក្រុមឡើងទៅកាន់វគ្គបន្តរួចរាល់ហើយ ពោលគឺរួមមានក្លិប Bayern Munich របស់អាល្លឺម៉ង់ និង Juventus របស់អ៊ីតាលី។ ដោយឡែក ក្រោយបញ្ចប់ ៨ប្រកួតយប់មិញនេះទៀត បេក្ខភាពដែលបានកក់កៅអីឡើងវគ្គបន្តជាផ្លូវការដែរនោះរួមមាន Liverpool របស់អង់គ្លេស និងជើងឯកលីគហូឡង់ Ajax Amsterdam។

ហង្សក្រហម Liverpool យប់មិញនេះបានបន្តបំបាក់ក្រុមជើងឯកអេស្ប៉ាញ Atletico Madrid ដោយលទ្ធផល ២-០ នៅកីឡដ្ឋាន Anfield របស់ខ្លួន ដែលនេះជាជ័យជម្នះ ៤ប្រកួតជាប់គ្នាក្នុងពូល B ខណៈក្រុមជើងឯក UCL ឆ្នាំ២០១៩ខាងលើ ប្រមូលបាន ១២ពិន្ទុពេញ និងជាក្រុមលេខ ១ ប្រចាំពូលតែម្តងទោះនៅសល់ ២ប្រកួតទៀតក្តី ដោយដាច់ក្រុមលេខ ២ FC Porto ៧ពិន្ទុ ដាច់ At.Madrid ៨ពិន្ទុ ខណៈ AC Milan ក្រុមបាតតារាងទើបមាន ១ពិន្ទុប៉ុណ្ណោះ។ ២គ្រាប់យប់មិញនេះធ្វើបានដោយ Diego Jota នៅនាទីទី១៣ និងនៅនាទីទី២១ ពីខ្សែប្រយុទ្ធ Sadio Mane។ គួរបញ្ជាក់ថា នៅជើងទី១នាទឹកដី Wanda Metropolitano, Liverpool បានឈ្នះ At. Madrid ដោយលទ្ធផល ៣-២។

ក្រឡេកមកចាប់អារម្មណ៍ក្រុមមួយទៀតដែលឡើងទៅកាន់វគ្គបន្តដូចគ្នា ពោលគឺ Ajax Amsterdam របស់ហូឡង់ ដោយបានបន្តបំបាក់ Bourussia Dortmund ក្នុងលទ្ធផល ៣-១ ដល់ក្នុងទឹកដី បន្ទាប់ពីឈ្នះជោគជាំ ៤-០ នៅទឹកដី Johan Cryuff របស់ខ្លួនកាលពីជើងទី១។ ការប្រកួតនេះ ម្ចាស់ផ្ទះ Dortmund បើកការនាំមុខមុនដោយបាល់ពិន័យ ១១ម៉ែត្ររបស់ Marco Reus ក្នុងនាទីទី៣៧​ ខណៈ ៣គ្រាប់របស់ក្រុមភ្ញៀវ Ajax យប់មិញនេះ ត្រូវរង់ចាំដល់វគ្គទី២ ទើបត្រូវធ្វើបានដោយខ្សែប្រយុទ្ធ Dusan Tadic, Sabastian Haller និង Davy Klaassen ម្នាក់មួយគ្រាប់។ Ajax ពេលនេះមាន ១២ពិន្ទុ តាមពីក្រោយដោយ Dortmund និង Sporting Lisbon មាន ៦ពិន្ទុដូចគ្នា ខណៈ Besiktas របស់តួកគីនៅមិនទាន់មានពិន្ទុរាប់នៅឡើយ។

ការប្រកួតបន្តទី៥ នឹងធ្វើឡើងនៅថ្ងៃទី ២៤ និងថ្ងៃទី២៥ ខែវិច្ឆិកានេះ។ ដោយឡែកចំពោះលទ្ធផលរួមនៅការប្រកួត យើងនឹងបង្ហាញក្នុងតារាងនៅខាងក្រោមនេះ។